Ueves da Pasca depënc da anda Aurelia Langer

Danter la richëzes dl Museum Gherdëina iel nce na culezion de n 50 ueves da Pasca depënc a man da anda Aurelia Langer ti ani ‘60.
Na selezion de ueves de anda Aurelia ie da udëi nchin ai 1 de auril tl segondo partimënt dl Museum.

Aurelia fova na muta de Felizita Unterplatzer y bera Sëpl Moroder da Jumbierch, nasciuda ai 10 de dezëmber 1886. L ann 1912 se ala maridà cun l fotograf Stefan Langer y à abù cinch mutons: Otto, Relly, Traudl, Helmi y Franz. L uem y tramedoi mutons ala perdù tëmp de viera.

Da si pere, l Lusenberger, ova anda Aurelia arpà si vëta artistica. Do la segonda viera fovela da urté belau uni di tla butëiga „Langer“ pra si mutans Relly y Traudl, ntlëuta l sëul post ulache univa svilupedes fotografies a Urtijëi. Ëila se òva abinà ora na tecnica speziela per ti dé culëur ala fotografies blanch y fosch; y tlo te butëiga depenjova anda Aurelia nce i ueves da Pasca.

Danter i motives plu particuleres ie chël da dlieja da Sacun cun l Saslongh o dl ciastel Fischburg. L plu gën depenjova anda Aurelia szenes de pitli mutons che fej damat o s’la cianta y sona, che se scinca n maz de ciofes o se dà n bòs. I desënies dla muniga jëuna Berta Humel, che ntlëuta do la segonda viera ova truep suzès pra l publich tudësch, ti fova de ispirazion. Plu tert à mo si muta Traudl Langer depënt inant ueves da Pasca te butëiga coche si oma, dantladut motives de ciofes.

Uef da Pasca dl Lusenberger
N auter juel unich ie sëurapro da udëi tla mostra: n pitl uef cueciun che la jëuna Annamaria Sanoner da Mauriz ova dedicà a si nevic Sëpl da Jumbeirch l ann 1869. Annamaria ie lessù denventeda si prima fëna y ie morta cinch ani do de pert.
Cun na man fina che fej maruieia à la jëuna Annamaria crazà ite tla crosa cuecena motives dut ntëur al uef: strumënc de mujiga cun notes, ciofes n flëura cun doi cueres y lepro n n ferstl de cinch risses cun na detlarazion d’amor:

„In der Nähe liebe ich dich zärtlich,
in der Ferne liebe ich dich treu.
Und sollst du mich haben,
so wirst du erfahren,
dass ich allezeit dieselbe sei...”


L pitl uef da Pasca che se à cunservà tres la generazions ie unit dunà adum cun la culezion de ueves de anda Aurelia al Museum Gherdëina da Elfi Demetz dl Langer.

I ueves da Pasca ie mo da udëi tla mostra nchin ai 1 de auril 2016.