Museum de Gherdëina

L Museum de Gherdëina a Urtijëi pieta n cheder unich sun l’arpejon culturela de nosc raion.

Culezions de curëc y minerei de marueia conta de coche l se à furmà i crëps dla Dolomites dan da passa 200 milions de ani, scultures y chiena da n iede documentea la storia dl ert’ dl ziplé dal 17ejim secul insù.

Da udëi iel nce reperc archeologics y pitures de bera Ṥepl da Jumbierch y de d’autri artisć. Danter i pec preziëus iel l bel Drap dla Pascion ora dla dlieja da Sacun, l Crist de Val dl 15ejim secul y l Crist de Sëurasas dl 1932.

Tla mostra nueva „Bierjun 1490. I sucrëc de na majon“ iel da pudëi amiré dessënies scialdi reres fac cun crëida cuecena sun n taflà de lën dla fin dl medieve.