L Geoportal di bëns culturei de Gherdëina ie online
La plata digitela dl Museum Gherdëina localisea bëns culturei y pieta jites tematiches
L Museum Gherdëina à presentà dan curt l Geoportal di bëns culturei de Gherdëina. L portal web nuef ie sën online y da pudëi consulté sota https://geo.museumgherdeina.it/.
Presentazion dl portal online
Pra la manifestazion cun autoriteies, partner y sponsores dl proiet fova presënc nce i ambolc de Urtijëi y S. Cristina, Tobia Moroder y Christoph Senoner, i diretëures dla Cultura ladina André Vittur y Mathias Stuflesser, di Ufizies provinziei per i Museums y per la Questions linguistiches, dla Funazion Dolomites Unesco, dla Lies dl Turism y dla Lia da mont. La vizepresidënta dl Museum Gherdëina, Christa Kasslatter, à auzà ora te si rujeneda l gran mpëni da pert de dut l team dl proiet y à sentì gra a duc i partner y sustenidëures dla iniziativa.La diretëura dl Museum, Paulina Moroder, à purtà dant l’idea de basa per la plata digitela, che fej da puent y liam danter l’arpejon culturela cunserveda tl Museum y l paesaje, danter frabicac de nteres storich y si cuntreda nteurvia. La cuordinadëssa dl proiet, Jessica Mauroner, á lessù spiegà dal vif la strutura dl Geoportal cun si categories y criteres de nuzeda.
Finanziamënt
N aspet mpurtant ie l finanziamënt per l investimënt tecnich che ie uni cunzedù da pert dl’Union Europea tres l program PNRR (Piano Nazional de Ripresa e Resilienza) dl Ministero dla Cultura. L Museum Gherdëina òva venciù chësc sustëni dl 2023 do avëi arjonjt na valutazion de 81/97 ponc cun l 69ejim post sun ndut 901 proiec a nivel naziunel. La deferënza dla spëises ie unica curida da cuntribut dla Lies dl turism y dal Cunsorz di mplanc portampont de Gherdëina.Cie iel pa da scuvierjer tl Geoportal?
I vijitadëures dla plata web https://geo.museumgherdeina.it/ possa scuvierjer sun na gran cherta de Gherdëina pec de valuta ora dla culezion dl Museum de geologia, paleontologia, mineralogia, archeologia, ert, artejanat artistich y autri documënc storics. Sëurapro Passa 200 obgec ie nsci unic cris ora y localisei tla lueges de si abineda tl paesaje o pruvenienza dala cuntreda. N possa mparé a cunescer la storia de cëses storiches liedes ala prodzion artistica y al turism y mo autra architetura che caraterisea nosc luesc.Duc i bëns che ie localisei geograficamënter sun la cherta digitela vën presentei cun tesc informatives y de bela fotografies, te vel cajo nce cun videos. Per chiche ulëssa jí plu sot tl argumënt ie uni pez dla culezion dl Museum cunlià cun l catalogh provinziel di ogec di museums y archives y mo autri links a plates de nteres.
Mplu pieta l Geoportal jites tematiches particuleres per scuvierjer lueges liedes al’arpejon culturela da na pruspetiva nueva. Nsci possun se cialé ju tres na lingia de monumënc tl zënter storich de Urtijëi y mejes tl raion de Sacun o scuvierjer lueges de mpurtanza archeologica, minerei carteristcs dla Mont de Sëuc y la furmazions geologiches dl raion dolomitich. L Geoportal ie perchël n strumënt digitel faszinënt sibe per la jënt dl post che nce per ghësc, per l nseniamënt che per la nrescida.
Per arjonjer n publich lerch ie l portal nce azesibel tla cater rujenedes: ladin, tudësch, talian y nglëisc. Sëurapro iel struturà tecnicamënter zënza rëms per persones che à dificulteies de vista. Nfin pieta l Geoportal mo elemënc interatives y funzions de juech per nteressé nce i plu jëuni a scuvierjer i liams danter cultura y natura.
Patrozine y defendura
Nfin, de gra ala bona cunlaurazion cun la Lies dl turism, ie l Geoportal n strumënt per nvie ite a scuvierjer la storia y cultura dl raion y sutenì n turism plu sustenibel. Cun chësc fin à la Fundazion Dolomites UNESCO cunzedù l patrozine per chësc proiet digital a bën dla valorisazion dl’arpejon culturela y na mieura cunescënza dla storia dl raion dolomitich y de si jënt. Sun l portal vën nce auzeda ora la respunsbeltà per la cura di bëns culturei y de comuniché na scuvierta nueva de ogec al Museum o ala autoriteies de cumpetënza.L team dl Museum Gherdëina mbincia legrëza a viagë tres l portal y a scuvierjer cosses nueves!
https://geo.museumgherdeina.it/
