„Fuga tl Egit“

La storia biblica conta che Ujep, Maria y Gejù Bambin mucia de viers dl Egit, do che Erode ova tëut la dezijion de mazé duc i mëndri sot ai doi ani, danter Betlem y ti raions ntëurvia, per tëma che coche dijiova la profezia, un n mut fossa deventà „rë di Judieres“ y ëssa tëut ju Erode da si tronn y unian po mancia de si putënza.

Ala Sacra Familia ti aspietel śën n tëmp de trica y tëmes, l messëi for se ascuender cun la śira dl despot de ulëi ti tò via la vita. Zënza perdujer, tol Ujep, Maria y l fantulin, i fej senté sun l musciat ntan che ël l mëina pra ciavazina, l sparunan acioche l vede l plu aslune puscibl. I uel ruvé tl Egit, ulache i spera de abiné la pesc y la lidëza, almanco nchin che la Palestina devënte inò n luech segur.

Albino Pitscheider realisea chësta pitla figura zipleda dl 1958, mudan mé n fruz l’iconografia:
Ujep sënta sun l musciat, cun amor se tën Maria pra d’ël y l Bambin Gejù pond te si brac.
L musciat zapa via cun fadia, chësc nes lascel ntraudëi cun si cë danjù per l pëis y per l viac lonch: Ujep se ëuta y mët averda che deguni ne ti vënie do.
L artist sà da dé ite l sentimënt de festide y pericul, perchël ne se pierdel nia ti details y se cunzentrea dut sun i prutagunisc’ y zipla cun taies stersc y lerc tl lën de zirm, ti dajan ite formes scëmples plu che linies a puntin.

La storia dla salvëza tres la fuga ie ncueicundì cronica da unidì; audion di per di spavënc de pëines y mort, dl sfrutamënt supurtei da n stermile de desperei che vën docà da luesc ulache l ie la viera y gran puertà. Purvan a ti mucé cëli de abiné n albierch tl rich y liede Uzidënt. „Migranc“ ie la parola nueva per chësta persones, che se n jan demez da si ncësa à bele messù passé na vita turmenteda, y śën scumëncia per ëi n viac dejuman, ala crissa de n paesc che i tole su y ne i sburdle nia demez, coche l suzed al didancuei purturep bëndebò suvënz, iló ulache l rënia la tëma.

(repurtà dal talian: Monika Kelder)

http://www.provincia.bz.it/catalogo-beniculturali/it
http://www.provinz.bz.it/katalog-kulturgueter/de