24 de merz: l Geoportal va online
L’elaburazion dl Geoportal di bëns culturei dl raion de Gherdëina ie tan che stlut ju. Bele ai 24 de merz dl 2025 jirà l portal online. Per l prim iede aran pona na plataforma digitela sun chëla che l’arpejon culturela ne unirà nia mé prejenteda ma nce localiseda geograficamënter. Cun chësc proiet ti dà l Museum Gherdëina a si nuzadëures la puscibltà de crië na relazion danter oget y luegia d’abineda/pusizion.L’idea sun chëla che l Geoportal ie struturà ie scëmpla: sun na cherta digitela vëniel presentà bëns culturei dl raion de Gherdëina seleziunei ora dla culezion dl Museum Gherdëina coche nce frabiches reprejentatives dla valeda. Nsci vëniel per ejëmpl cunlià reperc archeologics y paleontologics cun si lueges d’abineda, minerei tipics dl raion cun la particulariteies geologiches dla Mont de Sëuc y opres d’ert cun i zëntri de produzion o cun l’architetura che fova n iede ntëurvia. A chësta maniera cunlieia l Geoportal la storia dla region cun si cuntreda unica n mustran su a na maniera interativa si richëza culturela.
Cherta, ogec, jites
Oradechël iel tl Geoportal per uniun di ogec prejentei na lingia de nfurmazions tla forma de tesć tlarienc, fotografies y videos che nfurmea la/i nuzadëures n cont di ogec curespundënc. Da abiné tl Geoportal iel nce prupostes de jites, cossa che n fej dainora n mesun de mpuranza sibe per la jënt nteresseda dla valeda sibe per i ghesć y per dut l setor dl turism.Metù a jì ie l Geoportal tl cheder dl program de sustëni dla Union europeica per la trasfurmazion tl ciamp culturel criatif cun n cuntribut dl Ministere per la Cultura dla Talia (Miscion 1 – Nvestimënt 3.3.2 dl Program Naziunel de Recostituzion y Resilienza PNRR).
L Geoportal va bele online ala fin de merz y vën prejentà a duta la persones nteressedes tl cheder de na manifestazion ufiziela. Chësta sarà ai 24 de merz 2025 dala 20.00 tla gran sala dl Museum Gherdëina. Dadedò pudran vijité la esposizion dl Museum y ti cialé da daujin a n valgun ogec. La ntreda ie debant.
Per deplu nfurmazions: 0039 0471 797554 – info@museumgherdeina.it
