Di nternaziunel di Museums 2026 tl Museum Gherdëina
Dumënia, ai 17 de mei 2026 | OPEN DAY: 10:30–18:00 | Ntreda debant
L Museum Gherdëina nvieia n dumënia, ai 17 de mei 2026, al Di nternaziunel di Museums. L tema de chëst ann de ICOM, „Museums uniting a divided world", mët tl zënter la forza dl museum sciche luegia de dialogh, cumprenscion y coejion tla sozietà.
Adum cun la Biblioteca ladina dla Union di Ladins de Gherdëina, ti aspieta ai vijitadëures n program scialdi rich: da uni ëura vijites menedes cun esperc y espertes tla sezions deferëntes, na “crissa dl tesor” interativa per mutons y mutans, families y granc, y ativiteies creatives tla mostra nueva di juesc Sevi.
Tl foyer vëniel prejentei i media digitei ntëur ala culezions online dl Museum – dal „Geoportal di bëns culturei de Gherdëina” ai cataloghes online dla cultura materiela y ai contenuc video.
Tla Biblioteca ladina vëniel mustrà material de films digitalisei di ani ’60 y ’70 (zënza sonn) de Georg Runggaldier (1944–2001), prim cameraman dla RAI ladina.
L Museum y la Union di Ladins infurmea nce sun la situazion atuela n con’ dl pruiet „Cësa di Ladins y Museum nuef” y nvieia la jënt al dialogh. Tl spirit dl tema de chëst ann, se prejënta l Museum sciche na luegia davierta al cunfront, ulache vën cumpartides perspetives, rujenà de ideies y svilupà deberieda traverc a sustenì la realisazion dl Museum nuef.
L cunsëi dl Museum Gherdëina prejënterà nce l cërtl di sutenidëures „Nosc Museum”.
Ntan marënda, dala 11:30 inant, iel da giapé te verzon velch da bever y da maië n cumpania de bela mujiga.
Nuzevë dl’ucajion per scuvierjer l Museum y la Bibliotech ladina!
L team d’urganisazion se ncunforta sun vo!
Pugram: Esperc conta
10:30 Mostra Sevi “Dal lën al juech”I designer dla SEVI
cun Georg Senoner, presidënt Museum Gherdëina
11:30 Trothes
La gherlanda spiza – La bagana – La cazina
cun Franziska Beikircher, sarturëssa
12:00 Bierjun 1490
Bierjun, sucrëc de na majon
cun Paulina Mororder, Diretëura dl Museum
14:00 Cruëc y minerei
Sasc da ciauc, dolomites y laves
L ambient dl Itiosaur
cun Johann Comploj, Co-scuvridëur dl Itiosaur de Secëda
15:00 Fauna
Tieres y uciei
cun Silva Demetz, ciaciadëura y Iacun Prugger, ornitologh
16:00 Fauna
Pavëi de Gherdëina
cun Viktor Canins, fotograf
16:00 Mostra “Pec de n mond”
“La pitura dl sunadëur cun l orgun da mené”
cun Jamila Moroder, storica dl’ert y curadëssa
Dala 10:30 iel davierta la Bilioteca Ladina. Tlo ti puderan cialé dut l di ai filmac de Georg Runggaldier (1944–2001) di ani ’60 y ’70.
Dala 11:30 marënda cun mujiga tl verzon dan la Cësa di Ladins.
Ntan dut l di iel da scuvrì l Museum tres na „Crissa dl tesor”, per pitli y granc.
